'A STATI SI MOVI (poesia dialettale letta dall'autore)

‘A STATI SI MOVI

Cogghi cucùnci,
ruvettu chi punci,
chiàppiri novi,
‘a stati si movi.

Si modda ‘nto scuru ‘a taddarìta,
miàgula ‘u iattu chi cecca la zita,
‘u vemmu ‘ntall’ebba si llustra ‘a scarpèra
‘a buffa ‘nta gèbbia si ùscia ‘a cuddèra.

‘U stuppatèddu si ‘nfossa ‘nta terra,
‘i cani ch’i iatti si fannu la guerra,
‘i suricèddi si fannu vardàri
‘i suriciàzzi ti fannu scantàri.

Ciùri sabbàggi culùri a gogò
crisci ‘nta rasta ‘u bacilicò,
l’ebba maligna ti nnìgghia ‘u giaddìnu,
ma pìgghia ciatu lu putrusìnu.

‘I pumadòru cchiù russi si fannu
puru s’ommài ci su’ tuttu l’annu,
‘i mulinciàni si fannu viòla,
ci su’ cucuzzèddi, faciòli e tritròla.

L’acèddi si cùntunu ‘i storii friscannu,
magàri su’ làstimi vecchi d’un annu;
l’ovu ‘i iurnàta ti fa la iaddìna
chi sogna ‘na lanna di vasellina.

‘U iaddu ti sbìgghia c’u chicchirichì,
e isa la testa, sapìti picchì?
ringrazia ‘u Signuri, artèfici ranni,
chi fici i iaddìni senza mutànni.

Bratti e pidòcchi, zzicchi e zanzàri
fannu cuvata e su’ pari pari,
si non ti nnigghi cu cetti vilèni,
di fari vacanza non ti cunveni.

Cogghi cucùnci,
ruvèttu che punci,
chiàppiri novi,
‘a stati si movi.