'DDA MANU (poesia dialettale letta dall'autore)

'DDA MANU
Basta pensarci per rendersi conto di quante cose può fare la mano di una mamma. Finchè le è dato un minimo di forza vitale, essa cerca il tuo viso per regalarti ancora una carezza.


'Dda manu!
'Dda manu chi ti tocca a lu vagìtu,
chi 'ccumpagna li tô passi,
chi ti 'nguanta p'u vistìtu,
chi si scanta chi la lassi,
'dda manu!

'Dda manu chi ti porta 'i nutrimenti,
chi sfacenna 'nta cucina,
chi ti tocca supra 'a frunti,
chi ti dugna 'a medicina,
'dda manu!

'Dda manu chi ti apri 'u purticatu,
chi ti 'nzigna lu caminu,
chi ti strinci senza ciatu,
chi ti spinci a lu distinu,
'dda manu!

'Dda manu chi sbannèra 'u fazzulettu,
chi trimanti si ritìra,
chi si 'mpòggia supra ô pettu,
chi non reggi e cunta l'ura,
'dda manu!

'Dda manu chi ti dugna 'na carizza,
chi ti 'sciuga la sudùra,
chi non temi la stanchizza,
sempri tènnira e sicùra,
'dda manu!

'Dda manu chi tastiannu non ti senti,
chi spittannu tàgghia e cuci,
chi ssi bàcia li sô santi,
chi ssi signa cu la cruci,
'dda manu!

'Dda manu chi ti 'llìscia e ti cunzòla,
chi ti cogghi 'a lacrimuzza,
chi t'accùccia li linzòla,
chi ti spamma tinirizza,
'dda manu!

'Dda manu chi si 'rrùnchia timurusa,
chi s'affrunta di tuccàri,
chi vurrìa ciccàri scusa,
chi non voli disturbàri,
'dda manu!

'Dda manu villutàta e ciaurùsa,
chi ti desi e non circàu,
delicàta e amurùsa,
chi non sempri ti truvàu,
'dda manu!

Dda manu  ch'ora è stanca e senza fozza,
‘dda manu chi non strinci cchiù li dita,
‘dda manu tenta ancòra 'na carizza,
‘dda manu ora è fridda e senza vita.
'dda manu, 'dda manu, 'dda manu!