MAMMUZZA MEI

MAMMUZZA MEI

Mammuzza mei,

ti sacciu santa perciò mi pregu a tia;

si vvidi ‘n’anciuleddu scavizzatu,

mànnilu ccassutta aùnni mia

chi haiu ‘na ‘mbasciata, ‘nu dittàtu:

aunn’è chi m’arricògghiu ‘nta famìgghia,

picchì cca ‘nterra ora tocca a mia;

Militta è ‘nta sô paci e non curtìgghia,

pecciò scavaccu un postu e così sia.

Vegnu unni la paci si cummina,

aunni ‘u suli percia la frischia,

unni la luna cerca e si rimina

pi fari la nuttata in cumpagnia.

Ti pottu quattru pisci di ‘stu strittu

un mossu î piscistoccu fattu â ghiotta,

dû braciuleddi ‘nta ‘nu spidu fittu

e dû cannola chini di ricotta.

Ti pottu li saluti di mê fìgghiu

chi ti vurria ccassùtta permanenti,

di tia figghittu non ni sapi nenti,

nui ci cuntamu pi tinillu sbìgghiu.

A Cesarina ci ‘nzignasti tantu,

ma ora non m’a portu pi ‘sta vota,

‘a lassu cu Manolu mi ci sta ‘ccantu,

apoi quannu decidi pigghia a rota.

Ora priparu quattru mmarazzeddi

e iammu ‘na truscitta quantu basta;

mi vògghiu godiri ‘ssu celu chinu î stiddi,

e mi nni ‘nchianu liggèru, costa costa.

Tono 23-07-2018