'A PISCA D'U TUNNU 'NTO STRITTU DI MISSINA (poesia dialettale letta dall'autore)

'A PISCA D'U TUNNU 'NTO STRITTU DI MISSINA

È pisca pill'omu solitàriu
chi voli raggiunàri c'u Signuri
ammenzu ô mari niru e senza umbri,
cu 'na barcuzza e un mossu di muturi.

'A corda arricugghiùta 'nte cannìstri,
'a traffinèra senza la suttàna,
'na lama pronta pi tagghiàri 'a cima
s'a sorti si rivòta e s'alluntana.

'N'occhiàta pi cuntrollu a giriàri,
si manzamà ci fu 'na liggirìzza,
e fora l'orru, dintra di lu mari,
'a lenza cu la isca e la spiranza.

Un sacchitèddu senza isaggiràri
p'avìri 'nu cunfòrtu 'nta nuttàta,
'na pocu d'acqua e vògghia di prigàri
mentri la barca scurri cumannàta.

Prega pi si scuntràri c'u giganti,
pi misuràri 'a forza e la scattrizza,
prega p'avìri a Diu di la sô parti,
pi ripurtàri ‘nterra 'na prudizza:

- Signùri chi sî ranni e onniputenti,
f'â chi lu tunnu cridi alla minzogna,
dammìllu battaglièru e tracutanti,
chi pèrdiri accussì non è virgogna -.

Poi è silènziu e 'a barca si trascìna;
'nta 'ddu silènziu vola 'a fantasia;
l'omu sulagnu penza alla marìna,
e a lu distìnu patruni dilla via.

Si fa dumanni supra alla Natura,
supra allu Diu e a tutta la sô Corti,
si pìgghia la questioni cu li vivi,
e si c'è tempu, discurri cu li morti.

E mentri la sô vita si spitùgghia,
'a manu scattra non si fa 'ngannàri,
e quannu di 'ntrasattu 'u pisci abbùcca,
è prontu, e sapi chiddu ch'avi a fari.

- Tira Rinaldu, senza respiràri,
a costu di lassàricci la vita;
'u pisci cu la fami havi a ristàri,
accà si giòca tutta la partìta -.

Ma è un cuntrastu chi non pô duràri;
è l'omu contru 'a forza d'a Natura:
- 'Nguanta Rinaldu, attentu a non muddàri,
puru si ietti sangu c'a sudùra -.

S'u Patetèrnu 'u vosi premiàri,
l'amu si desi 'i vessu e travagghiau:
- Modda Rinaldu, ora pôi lassàri,
e spera a Diu ch'u ferru s'allucàu -.

Fui lu pisci e 'a corda si cunzùma
friscannu comu un ventu 'i maistràli;
e guai a cû si trova 'nta 'dda trama:
'a fuitìna ci iettirìa fatàli!

Cinquanta, centu passi e puru cchiui,
'dda bèstia punta ritta contru ô funnu,
cerca ripàru e chianci mentri fui,
chianci lu mari appressu di lu tunnu.

Ma non è tempu ancòra di bannèri:
- Stuta ‘u muturi, munta 'ddi palèddi;
controlla tutti 'i ferri d'u mistèri;
scippa 'u timùni; 'a lama sabbapèddi..-.

Rinaldu si ripassa 'u cupiùni
comu a 'nu teatranti cuscenziusu;
havi rispèttu pi 'ddu bestiùni:
non c'è ‘na mossa chi va fatta a casu.

- Recùpera Rinaldu, non dulliàri,
'a corda ora scurri lentamenti;
tènilu in tiru senza esaggerari:
ricòrditi ch'u tunnu è cchiù putenti -.

Ora addiventa un giòcu di pacenza:
'u pisci fui, circannu la sabbizza,
Rinaldu ci cuntrasta cu la lenza
circànnu di struncàricci la fozza.

Ma si lu tunnu è "mònicu" c'a stola,
un tunnu troppu furbu e straputènti,
‘u porta supra 'a rocca 'i San Nicola
aùnni c'è la petra cchiù tagghiènti.

- Attentu ‘Aldu, non ci dari cima,
chi pi ‘na vota già ti fici fissa;
attàcculu ‘nta rota, ‘Aldu, e rima:
rìmicci contru, prima mi si ‘nfossa -.

‘A luci di lu Scìgghiu s’avvicina,
e pi tri voti ‘u tunnu fa la spola;
si senti la fatica ‘nta carìna,
‘a lenza tàgghia comu a li rasòla.

A lotta pô durari uri sani:
'u ciriveddu contru a la putenza;
ricorda tempi nòbili e luntàni,
tempi chi non parràunu di scenza!

Assumma di lu funnu lentamenti
cu giri larghi attornu a la barcùzza;
ancòra non è vintu lu giganti,
ma senti chi la morti l'accarìzza.

- Ora Rinaldu! Non ci dari tempu;
si ppìgghia ciàtu torna tracutànti,
c’a traffinèra non ci dari scampu:
c'è sempri un vincitùri e 'nu pirdènti!-

L'arpiùni cull’ali arricugghiùti
strazza li carni di 'ddu sventuratu
chi si dumanna cull'occhi spalancàti
a quali beni fu sacrificatu.

Ora pôi dari sfogu alla tô pena;
fu 'nu nnimìcu degnu e sfurtunatu.
Scuta Rinaldu, ascùta 'sta nuvèna:
è l’innu di lu mari a lu surdàtu -.

Pi tutti ‘i piscaturi è stòria vera:
c’è un vècchiu tunnu chi non fu mai piscatu;
è ‘u “patri di li tunni”, e si dispèra
chi ‘n’àutru fìgghiu ci lassàu lu ciatu!