'A SICILIA LIBBIRATA (poesia dialettale letta dall'autore)

 
'A SICILIA LIBBIRÀTA
Un ghiornu Canibardi, chi non avìa cuffari,
decìsi ch'a Sicilia s'avia a libbirari.
-Com'era 'ssu puliticu? a cu appartinia?
vutàva p'a sinistra o p'a democrazia?-

Chi c'entra la pulitica! era un gran ginirali,
un omu chi pinzava a un munnu libbirali.
Tempu 'na para i iorna nni cumminau millanta
di genti ginirusa e pi la guerra pronta.

Di ora, 'mpari Cicciu, 'ncumincia 'a vera storia
aùnni la Sicilia si cummigghiau di gloria!
Picchì si cumminaru, di milli ca parteru,
chiussài d'i cani i Brasi, 'n'esercitu daveru.

N'esercitu, cumpari, armatu a puntinu:
furcuni, accetti, pali, e quarchi timpirinu.
Chistu p'aviri idea di quali gran cicruni
si stava rivissannu incoddu a li burbuni.

-Tutti a Calatafimi... n'aspetta Canibardu;
picciotti avemu a curriri sinnò facemu tardu-.
E quannu finalmenti 'rrivaru 'nto zappatu,
già li cummattimentiavìunu 'ncuminciatu.

Vulàunu crisòmmuli e baddi di cannuni,
àutru ch'accetti, pali e mànichi i furcuni!
-Picciotti, accuminciamu, tiramu fora 'u cori,
chi cca si fa l'Italia oppuru cca si mori-

'A trumma già sunava la carica i seicentu
e 'ddi picciotti arditi partèru comu ô ventu:
accù muddava petri, accù curpazzi i lignu,
cû corpi di sciunetta chi n'arristava 'u signu.

Appena li burbuni li vìttiru opirari,
non foru chiù sicuri di puticcilla fari.
E nni mureru tanti, dill'una e l'autra parti,
e tutti figghiuleddi curpiti dalla sorti.

Ci foru tanti eroi, 'a storia li riporta,
accù ci'annàu ritta, accù ci'annàu storta.
 fini î 'ddu cunfrittu e prima d'a scurata,
l'esercitu burbùnicu battiu in ritirata.

Lassau li sô cannuni supra a li muntarozza,
e s'i vuliti avvìdiri su' esposti 'nta 'dda piazza.

Chista è la vera storia di la Sicila lìbbira!

L'Italia era unita sutta di 'nu riami,
ma 'nta Sicilia, 'mpari, cuntinuàu la fami:
'na vota li burbuni. 'na vota 'i turcomanni,
e ora c'è la mafia chi nni scutòla i panni.

Quarcunu dissi un ghiornu, o fossi lu pinzàu:
-Ma a 'stu Canibardi, cu cazzu lu prigau?-