VISIÒNI SUSPIRÀTA
Questa poesia esprime i sentimenti, di gioia, di tenerezza, di delusione e d'angoscia, che si sviluppano nella mente e nel cuore di chi, tornando a casa in treno, ha la visione della costa sicula.
Tutti 'ffacciàti, 'a mpigna d'a nuttàta;
'ntall'occhi ancòra 'a nìgghia mpiccicùsa:
- Ora cumpàri, visiòni suspiràta,
arrèti 'i 'na muntàgna calabrìsa!-.
Davànti, un celu chi mi dugna paci
e un mari azzurru fittu, merlettatu
di scumaredda ianca chi fa luci
unni lu sciuttu mmesti c'u bagnatu.
Marìna chi si cància la cammìsa
a la nisciùta di ogni galliria;
mi pari 'na sfilata purtintùsa
chi la Calabria organizzau pi mia.
'U suli c'u pinneddu 'nta 'na manu
spamma culùri senza rispammiari,
cull'àutra m'accarìzza chianu chianu,
e 'ddu tipùri mi fa suspirari.
'U trenu curri a tàgghiu di custèra;
cumpari e poi scumpari 'nta marìna;
nzicca 'nta 'ddi purtùsi e torna fora;
si torci tuttu comu a 'na murìna.
Ancòra 'na muntagna 'i trapassàri!
E dopu dû minuti 'i scuru fittu,
'a punta 'i Turrifaru mi cumpàri,
cu lu pilùni a guardia di lu strittu.
Vurrìa ittàri schigghi a li presènti
comu a lu marinàru cercatùri
quannu cumpàri terra all'orizzonti:
ma la mê stòria è stòria dilla genti!
Sû tutti ddà, cull'occhi spalancati
nnigghiàti di miràculu e sgumentu:
ch'i facci supra ô vitru mpiccicàti
rènnunu grazie a Diu pi lu purtentu.
Un fazzulettu iancu chi lampìa,
'na matri chi si strinci 'a criatùra,
un patri virgugnùsu chi tussìa,
un viaggiatùri stranu chi sculùra.
Un preti si cunfèssa avanti a Diu,
un senatùri russìa pi la virgogna,
un sìnnicu chi finci meravìgghia,
un magistratu chi giustìzia sogna.
Itàlia chi non vanti 'i tô biddizzi!
Sicìlia chi fai tortu alla Natùra,
chi t'accuntènti sulu d'i carìzzi
di 'na pulìtica orba e manciatùra!
Nessun commento:
Posta un commento
Scrivi un tuo commento per me. Te ne sarò grato.
Non occorre che tu ti identifichi.