'A SCATULA 'MMUCCIATA (poesia dialettale letta dall'autore)

 
‘A SCÁTULA ‘MMUCCIÁTA
È destino di ogni “poeta” immortalare nei propri versi gli affetti più cari; e la mamma, anche se non più presente, o forse ancor più per tale ragione, diventa l'oggetto di una sofferta e contrastata ricerca.
Io ho tardato molto a trovare la giusta sintonia tra forma e contenuto, e di questo chiedo perdono a mia madre, giustificando nel contempo il mio ritardo.

Ti pregu Mamma, non mi vardàri stortu,
'u sàcciu chi mancai di riverenza!
Però rimèdiu sùbitu a 'stu tortu,
ircannu 'u tô pirdunu e 'a tô climenza.

Vidi Mammuzza, fossi trascurài,
ma ti vulìa nèsciri d'a mmisca;
sulu chi ogni vota chi pruvài,
m'arritruvài c'a lenza senza isca.

Truvàva 'a rima e non vinìa lu vessu,
scrivìa lu vessu e 'a rima non baciàva;
mi cunvincia chi era tempu pessu,
chi cacchi cosa inzomma non quatràva.

Fossi non sugnu poi 'stu gran pueta!
Ma fattu stà chi quannu penzu a tia,
'u cori si ridduci, e mi si cheta
la stravacanza di la puisia.

È comu quannu nesci d'u casciùni,
dopu tant'anni chi non metti mani,
'dda scàtula ‘mmucciata, di cartùni,
vacanti di ricchìzzi e talismàni

ma china d'u tô tempu chi campasti.
E nesci ogni piddìcchiu, chianu chianu,
'mpuggiànnuti la testa 'nta 'na manu
e ripinzannu a quannu lu sabbasti.

Mi vidu figghiulèddu, e poi cchiù ranni,
e poi cchiù ranni ancòra e poi maritu,
cu tia sempri vicìna chi mi spanni
guccìtti di sudùri travagghiatu.

Mê fìgghiu non cumpàri 'nta curùna,
non fici a tempu (benedettu Diu!),
ma non pô malidìri la sfurtùna
picchì non sapi chiddu chi pirdìu!

E 'ddocu iò mi fermu, picchì avanti
ci sunnu sulu làcrimi di stizza:
'ddu iornu mmalidittu, ammenzu a tanti,
quannu ti fici l'ùltima carizza.

Mi stricu l'occhi pi livari 'a nìgghia,
rimettu 'i cosi a postu 'nta cascitta,
ièttu 'nu suspiruni a bucca apetta
e m'arricogghiu cu la mê famìgghia.