QUANNU LA VITA…

QUANNU LA VITA…

Quannu la vita ti lassàu ‘nta via,

fu l’unica vota chi chiancìa:

“è brutta, è brutta, gioia mia,

comu la cumminàu ‘dda malatia!”

‘A rràggia si mmiscàu c’u sentimentu,

ti vitti stracanciàri chianu chianu,

fu comu ‘na pitrata, un tradimentu:

 “Ma quannu mori ‘u corpu attorna sanu!”.

T’avissi misu un filu di russetu,

russu, chi sempri ti facìa papùzza,

‘na pocu di culuri ‘nta facciuzza,

e addivintavi riggìna ‘nto tô lettu.

Fossi fu fattu ma non mi n’addunài

e mi balìu ‘stu ricordu mei:

quannu la vita ti lassàu ‘nta via

e fu l’unica vota chi chiancìa.

Tono 17-08-2019
Clicca su nessun commento per lasciare un commento